झुंबर

मनातलं झुंबर

चित्रांत येते

टांगणीला जीव

लावून जाते.

एकाच डहाळीवर

आहोत सांगत राहाते

कानातलं झुंबर

गालाला भासते.

हिरव्या हर्षित मनांत

स्वप्नांचे झुंबर रंगते

गोऱ्या- सावळ्या वर्णाला

गुलाबी- लाली आणते.

४ जानेवारी २०२१ .

मनस्वी मन

" काल संध्याकाळी दोन च फुलं होती "

" हो "

" ... आणि आज पहाटे ओंजळ भर..."

" कालच्या आजूबाजूच्या कळ्या आज उमलल्या." 

 " ओंजळ तुझी च आहे ना..." 

" ...."

" ...आत्ता लक्षात आले तुला काय म्हणायचं... " 

" मनस्वी मना... " 

" काही आठवणी मनाच्या कप्प्यात नाही तर मनाच्या कुपीत साठवल्या जातात. ." 

" सगळ्यांच्याच.…"

" पण सगळ्याच नाहीत ".

" असेलही तसे. "

" तुझीच कविता आहे ना...

 सहवासाच असच असत

कळ्याना फुलं करत

आणि सुगंधा ला आठवण. " 

" आठवण... "

" आठवण हा शब्द नको. "

" का ?  " 

" पुन्हां मग तुझीच कविता... 

काही आठवत

तेंव्हा ते

कृष्ण- धवल च असते.

डोळ्यांतले पाणी

मनांत उतरते."

१ जानेवारी २०२१.

बकुळ

             

ते प्रत्यक्षात कमी 

आणि आठवणींत जास्त असते.

असं टिकायच असते

म्हणून ते खरखरीत असते.

बकुळीचे झाड

हलवावे लागत नाही

आठवणीं जाग्या

व्हायच्या राहात नाही.

पडतं तसं

एक- दोन, एक- दोन करत

अलगद आवाजाने

अलवार ओंजळ भरत.

३१ डिसेंबर २०२०.

एकीकडे...

एकीकडे मला मनस्वी म्हणतोस आणि  आणि दुसरीकडे हेही म्हणतोस की माझ्या मनातले मोकळेपणानं मी , अगदी तुलाही , सांगत नाही.

एकीकडे तुझ्या असं म्हणण्याची मला गंमत वाटते आणि दुसरीकडे याची आपल्याला  , अगदी दोघांनाही , मनोमन खात्री असते की असं बोललोच तर आपण एकमेकांशीच बोलू.

एकीकडे तुझ्या असं म्हणण्याची मस्करी होते आणि दुसरीकडे तू अस म्हणाला नाहीस, अगदी दोन दिवसांत , तरी माझं मन त्याची वाट पाहायला लागते.

अगदी खरं सांगायचं तर..

मनातल्या सगळ्याच गोष्टी या सांगण्यासारखा नसतात कधी कधी...

म्हणजे सांगायच्या ही नसतात काही वेळा..

एकीकडे तुला हे पटणार नाही हे माहीती असते आणि दुसरीकडे तुझी बाजू , अगदी तळमळीने , कसं पटवून देशील याचं चित्र मनोमन रंगवले जाते.

म्हणूनच मला एकीकडे मनस्वी म्हणतोस आणि दुसरीकडे त्याचवेळी त्यावरूनच मानापमान , अगदी भावबंधन , मनात आणतोस ना...

एकीकडे....

२६ डिसेंबर २०२०.

सय

आत्ताच तुझी दोनदा आठवण आली...

चहा करताना दूध घेताना साय आली

आणि नंतर

चहा मगमधे ओतल्यावर चहावर साय आली.

काय आपलं मन असत ना !

कशी सांगड घालत ना ?

साय ही अशी एक वस्तू जी मला बिलकुल आवडत नाही.

आणि 

तू अशी एक व्यक्ती जिच्यावाचून मी मी उरत नाही.

सय आणि साय...

**

 बरं झालं.

सांगितलेस....

तुझीच एक कविता आहे ना....

" मनातलं सांगत जावं

निदान काहीवेळा

मनाजोगते उत्तर मिळत

काहीच वेळा." 

सय आणि साय .....

२५ डिसेंबर २०२०.

निळाई

अशी निळाई 

काय काय घेऊन येते

उरात भरून येते,

 उरी दाटून राहते.

डोंगर जोडून

नभ उजळून

तरीही ऊरून

जणू डोळा पाणी येते.

अशी निळाई

तिन्हीसांजेला अलगद

वेडी

युती सांगते.

२२ डिसेंबर २०२०.

युती

  

                             

काल म्हणे आकाशात

गुरु- शनी युती होती.

आमच्या मार्क- शीटात

तर ती केँव्हापासूनच होती.

काल अगदी युती

दुर्बिणी लावून पाहीली

आमच्या युतीला मात्र

झाडूने झोडली.

मराठीत सांगितलं

जुनं ते सोनं

मग आमच्या युतीतल

दूषणे देऊन का सजले.

काळ- काम- वेग

हे काय पुस्तकांत शिकतात

आमच्या युतीत

कधीच व्यवहारात आणतात.

आमच्या पेपर मधला इतिहास

पुस्तकापेक्षा वेगळा होता

कालच्या युतीचा इतिहास

आता पुस्तकांत आणतात.

काल म्हणे ऐन्लार्ज करून पाहा

शनीची कडी स्पष्ट दिसतात

आमच्या युतीला मायक्रोस्कोपात पाहात

टोचून बोलत राहतात.

आमच्या युतीला

वर्गातल्या पोरी फिदिफिदी हसल्या

कालच्या युतीला

नवऱ्याच्या साक्षीने पोस्टत राहिल्या.

२२ डिसेंबर २०२०